Útgjöld ríkissjóðs til almannatrygginga og velferðarmála

Úr Vefriti fjármálaráðuneytisins 21. nóvember 2007 - þú getur gerst áskrifandi að vefritinu.

Samkvæmt fjárlagafrumvarpi 2008 verða útgjöld ríkissjóðs til almannatrygginga og velferðarmála samtals 94 milljarðar króna.

Frá árinu 1998 og til ársins 2008 er áætlað að útgjöld í þessum málaflokki aukist um 38 milljarða króna og er þá tekið tillit til verðlagsbreytinga. Það jafngildir 68% aukningu að raungildi.

Í töflunni má sjá árleg útgjöld til almannatrygginga og velferðarmála á árinu 1998 á áætluðu verðlagi ársins 2008 samanborið við fjárlagafrumvarp 2008. Útgjöldin samsvara 21,9% af heildarútgjöldum ríkissjóðs samkvæmt fjárlagafrumvarpi 2008. Árið 1998 voru útgjöldin í þessum málaflokki 19,2% af heildarútgjöldum ríkissjóðs og hefur því hlutdeildin hækkað um 2,7 prósentustig.

Yfir helmingur útgjaldanna er vegna lífeyristrygginga til elli- og örorkulífeyrisþega en þar hafa árleg útgjöld aukist um 21 milljarð króna á tímabilinu. Þá hafa útgjöld vegna sjúkra-, mæðra- og örorkubóta aukist um 6 milljarða króna og útgjöld vegna málefna fatlaðra um tæplega 5 milljarða króna.

Ekki þarf að koma á óvart að útgjöld í málefnaflokknum aukist nokkuð, meðal annars vegna fólksfjölgunar. En aukningin er þó mun meiri en sem nemur fólksfjölgun þar sem útgjöld á mann hafa hækkað umtalsvert eða um 46% á árunum 1998 til 2008 m.v. áætlað verðlag 2008. Samkvæmt fjárlagafrumvarpi 2008 verða útgjöldin tæplega 300 þús. kr. á mann en voru um 205 þús. kr. á mann árið 1998.

Útgjöld ríkissjóðs til almannatrygginga og velferðarmála

í milljónum króna