Frumvörp sem hafa þýðingu fyrir fjölmarga landsmenn
Á þingmálaskrá félags- og húsnæðismálaráðherra fyrir komandi þingvetur eru fjölbreytt málefni sem snerta daglegt líf fólks um land allt, meðal annars leigjendur, launafólk, örorkulífeyrisþega, ellilífeyrisþega, fatlað fólk og innflytjendur. Alls hyggst Ragnar Þór Ingólfsson, félags- og húsnæðismálaráðherra, leggja fram 14 mál á Alþingi, þar af 13 frumvörp og eina þingsályktunartillögu.
„Við ætlum að halda áfram að vinna í þágu fólksins. Þingmálaskrá vetrarins og þau fjölmörgu umbótamál sem þar er að finna endurspegla það,“ segir Ragnar Þór.
Aukið öryggi og fyrirsjáanleiki á húsnæðismarkaði
Fimm mál á þingmálaskrá félags- og húsnæðismálaráðherra snúa að húsnæðis- og mannvirkjamálum.
- Með breytingum á húsaleigulögum verður lagt til að settur verði skýrari rammi um reglubundnar breytingar á leigufjárhæð á samningstíma og að mánaðarleg vísitölutenging leigu verði óheimil. Markmiðið er að auka stöðugleika og fyrirsjáanleika fyrir leigjendur.
- Breytingar eru fyrirhugaðar á fyrirkomulagi húsaleigutrygginga til að auka réttarvernd leigjenda og leigusala, einfalda og skýra kröfuferla, auka fyrirsjáanleika um endurgreiðslu tryggingarfjár og fækka ágreiningsmálum.
- Lög um almennar íbúðir verða endurskoðuð með það að markmiði að húsnæðisstuðningskerfið stuðli enn frekar að framboði íbúða með viðráðanlegum húsnæðiskostnaði.
- Lagðar verða til breytingar á skipulagslögum sem hafa það að markmiði að einfalda málsmeðferð og stytta skipulagsferla.
- Breytingar á lögum um mannvirki tengjast síðan heildarendurskoðun byggingarreglugerðar og er meðal annars ætlað að gera byggingareftirlit skilvirkara, draga úr byggingargöllum og auka neytendavernd.
Öflugri þjónusta og aukið öryggi
Þrjú frumvörp snúa að þjónustu við fatlað fólk, félagsþjónustu sveitarfélaga og rannsókn á alvarlegum óvæntum atvikum í velferðarþjónustu.
- Breytingum á lögum um þjónustu við fatlað fólk með langvarandi stuðningsþarfir er ætlað að styrkja þjónustuna, bæta aðferðir við mat á stuðningsþörfum og innleiða samræmda grunnskráningu vegna umsókna og veittrar þjónustu.
- Samhliða verður lagt fram frumvarp um breytingar á lögum um félagsþjónustu sveitarfélaga til að styrkja það grunnþjónustuhlutverk sem félagsþjónustan gegnir hér á landi. Breytingarnar fela í sér nýmæli í þjónustu, þar á meðal um viðbrögð við ofbeldi, áfangaheimili og aðstoðarmannakort, auk samræmdari aðferða við mat á þjónustuþörf og skráningu.
- Þá verða lagðar til breytingar á lögum um Gæða- og eftirlitsstofnun velferðarmála til að styrkja rannsókn alvarlegra óvæntra atvika í félagslegri velferðarþjónustu. Markmiðið er að rannsókn slíkra atvika nýtist til að koma í veg fyrir að sambærileg atvik endurtaki sig.
Breytingar tengdar almannatryggingum
Tvö frumvörp á þingmálaskránni snúa sérstaklega að almannatryggingum.
- Annars vegar verður lagt til að skýrar verði kveðið á um greiðslu orlofs- og desemberuppbóta til örorku-, hlutaörorku- og ellilífeyrisþega og sjúkra- og endurhæfingargreiðsluþega. Jafnframt verður lagt til að tekjulágir einstaklingar í þessum hópum eigi rétt á sérstakri eingreiðslu í desember 2026 til viðbótar við desemberuppbót.
- Hins vegar eru fyrirhugaðar breytingar sem meðal annars varða grunnmat vegna sjúkra- og endurhæfingargreiðslna og skýrari reglur um réttindamyndun til örorku- og hlutaörorkulífeyris.
Réttindi á vinnumarkaði
Á sviði vinnumála eru þrjú frumvörp fyrirhuguð.
- Frumvarp verður lagt fram til nýrra heildarlaga um Ábyrgðasjóð launa. Endurskoðunin tekur meðal annars mið af þeim breytingum sem orðið hafa á vinnumarkaði frá því núgildandi lög tóku gildi árið 2003.
- Fyrirhugað er að leggja til að lögfest verði viðurlög við brotum á lágmarkskjörum launafólks samkvæmt kjarasamningum.
- Þá er fyrirhugað að gera breytingar á lögum um útsenda starfsmenn og skyldur erlendra þjónustuveitenda vegna innleiðingar EES-reglna.
Framkvæmdaáætlun í málefnum innflytjenda
Á þingmálaskránni er jafnframt tillaga til þingsályktunar um framkvæmdaáætlun í málefnum innflytjenda fyrir árin 2026-2029.
- Verkefni framkvæmdaáætlunarinnar eiga að stuðla að samfélagi þar sem allir geta verið virkir þátttakendur óháð þjóðerni og uppruna.