Skuldir bænda jukust um 10% árið 1996

Tekjubrestur í landbúnaði veldur félagsmálaráðherra þungum áhyggjum. Skuldir bænda jukust um 10% á árinu 1996 þrátt fyrir nær engar framkvæmdir og samkvæmt niðurstöðum Gallup-könnunar fyrir félagsmálaráðuneytið hafa 8 til 9% bænda þurft að láta börn sín hætta framhaldsnámi vegna fjárskorts.

"Bændur borguðu stóran hluta þjóðarsáttarinnar á sínum tíma en hafa ekki enn fengið hlut í góðærinu. 40% þeirra voru í fyrra með minna en hálfar meðaltekjur í þjóðfélaginu 1996 og staðan hefur enn versnað," segir Páll Pétursson, félags-málaráðherra.

"Bændur hafa gengið á eignir sínar til að komast af í stað þess að leita til sveitarfélaganna um aðstoð. Vandræðin hafa verið mest áberandi hjá sauðfjárbændum þar sem kjötverð lækkar og dilkum fækkar. Nú fjarar hins vegar undan kúabændum líka.

Frá 1. september 1991 - ágúst 1997 lækkað verð dilkakjöts til bænda um 2 kr. kg beingreiðslur innreiknaðar. Á sama tíma stórfækkaði sauðfé og nú er það nær helmingi færra en það var flest. Á sama tíma hækkaði mjólkurlíter til bænda einungis um 2.50 þrátt fyrir stórhækkun aðfanga.

Opinber framlög til landbúnaðarins hafa lækkað um nærri helming úr 10 milljörðum í 5 og hálfan. Landbúnaðarráðherra, forsætisráðherra og félagsmála-ráðherra settu á fót nefnd til að fara yfir tekjustöðu bænda og gera tillögur til úrbóta. Þessi nefnd á að ljúka störfum um áramót.

Það er augljóst að innan skamms mun fjöldi sveitaheimila verða að leita á náðir sveitarfélaga sinna eftir félagslegri aðstoð og hún mun verða sveitahreppunum mjög þung í skauti.