Ávarp þegar teknar voru í notkun íbúðir fyrir fatlað fólk á Ísafirði
Bæjarstjóri, bæjarfulltrúar, íbúar, aðrir góðir gestir.
Mér er það mikið ánægjuefni að fá tækifæri til þess að vera með ykkur í dag þegar teknar eru formlega í notkun íbúðir fyrir geðfatlaða hér á Ísafirði.
Á undanförnum misserum hefur athygli í auknum mæli verið beint að aðstæðum og réttindamálum fatlaðs fólks í samfélaginu, þar á meðal fólks með langvinnar geðraskanir. Sjónir manna hafa meðal annars beinst að þörfum þess fyrir fjölbreyttari þjónustuúrræði og aukin lífsgæði og áhrifum notenda sjálfra á þá þjónustu sem þeir fá.
Þá vex þeim hugmyndum stöðugt fylgi að færa beri þjónustu við fólk með geðraskanir í ríkari mæli út í samfélagið, frá hefðbundnum sjúkrastofnunum, rjúfa einangrun og efla sjálfstæði þess og virkja þá reynslu og þekkingu sem það býr yfir. Það má fullyrða að búseta á áfangaheimili, í íbúðakjörnum eða þjónustuíbúðum með fjölbreyttri og sveigjanlegri stoðþjónustu geti veitt stöðugleika og öryggi sem stuðlar að jafnvægi í heilsufari og dregur úr líkum á endurinnlögnum á sjúkrahús.
Enn fremur hefur athyglinni verið beint að þörf fyrir aukna samhæfingu þeirra sem annast stefnumótun og þjónustu við fatlað fólk, það er félags- og heilbrigðisþjónustu og þar með ríkis og sveitarfélaga.
Mér er það vel kunnugt að hér á Ísafirði sem annars staðar á Vestfjörðum hefur í gegnum tíðina ríkt metnaður í þá veru að búa dyggilega að þjónustu við þá sem búa við fötlun af einhverju tagi. Það á jafnt við um sveitarfélögin og þá sem annast þjónustuna af hálfu Svæðisskrifstofu Vestfjarða. Þær íbúðir sem hér er verið að taka í notkun eru merkur vitnisburður um það. Bæjarfélagið sýnir þann styrk að láta duglega til sín taka í þjónustu við geðfatlaða íbúa sveitarfélagsins í samstarfi við Svæðisskrifstofu Vestfjarða og Heilbrigðisstofnun Ísafjarðarbæjar. Ég er þess fullviss að hér eftir sem hingað til muni það samstarf verða einkar notadrjúgt, bæði fyrir þá sem búa við geðfötlun og aðstandendur þeirra.
Oft er talað um samstarfsörðugleika milli ríkis og sveitarfélaga þegar kemur að framkvæmd velferðarverkefna af ýmsu tagi og iðulega er því haldið fram að þessir aðilar keppist við að kasta á milli sín ábyrgðinni. Það á engan veginn við hér. Traust og eindrægni einkennir samstarfið þar sem góð þjónustu við geðfatlaða er í forgrunni og þess gætt að þjónustan sé eins samþætt og skilvirk gagnvart notendum hennar eins og nokkur kostur er. Grunntónninn er sá að koma sem best til móts við þarfir þeirra sem þurfa á þjónustunni að halda, hér hafa aðilar tekið höndum saman og deila með sér ábyrgðinni í bróðerni. Notendur munu ekki þurfa að velkjast á milli þjónustukerfa eins og stundum er kvartað yfir heldur er þjónustan á einni hendi.
Í þessu sambandi ber einnig að geta þess að sú hugmyndafræði sem hér er lögð til grundvallar er í beinu samhengi við þær áherslur sem félagsmálaráðuneytið hefur lagt til í stefnumótun sinni í málefnum fatlaðra almennt, sem nú er á lokastigi, sem og sérstakri stefnumótun geðfatlaðra sem ég kynnti nýlega. Þar eru sett fram metnaðarfull stefnumið og áætlanir sem hafa það að markmiði að slá nýjan tón í þjónustu við þá sem búa við fötlun, þar á meðal geðfötlun. Verkefnið sem verið er að setja af stað hér í dag tekur til næstu fimm ára og hefur ríkisstjórnin tryggt rekstrar- og stofnfé til þess. Ég vænti góðs af frekara samstarfi félagsmálaráðuneytisins og Ísafjarðarbæjar um framkvæmd þessa verkefnis, geðfötluðum og aðstandendum þeirra til hagsbóta.
Ég óska þeim sem hér munu eignast heimili innilega til hamingju með daginn og einnig okkur hinum, því hér eru stiginn spor í þjónustu við fatlaða sem leiða okkur inn í nýja tíma.