Kristján L. Möller áfram samgönguráðherra

Kristján L. Möller er áfram samgönguráðherra í nýrri ríkisstjórn Jóhönnu Sigurðardóttu forsætisráðherra sem tók við í dag. Stjórnarsáttmáli ríkisstjórnar Samfylkingar og Vinstri hreyfingarinnar - græns framboðs var kynntur í dag.

Í stjórnarsáttmálum kemur meðal annars fram varðandi stjórnkerfisumbætur að fækka eigi ráðuneytum úr 12 í 9 í áföngum. Segir svo um samgönguráðuneytið: ,,Nýtt ráðuneyti sveitastjórna, samgöngu og byggðaþróunar fær til viðbótar við fyrri verkefni aukið vægi varðandi eflingu sveitarstjórnarstigsins, sem tengist m.a. tilfærslu verkefna frá ríki til sveitarfélaga, auk stefnumótunar á sviði byggðaþróunar.“

Í kafla stjórnarsáttmálans sem nefndur er sóknarstefna til framtíðar segir meðal annars: ,,Ríkisstjórnin mun efna til víðtæks samráðs undir forystu forsætisráðuneytisins um sóknaráætlanir fyrir alla landshluta til eflingar atvinnulífs og lífsgæða til framtíðar.“

Kristjáni L. Möller var fagnað af nánustu samstarfsmönnum í samgönguráðuneytinu. Með honum eru Ragnhildur Hjaltadóttir ráðuneytisstjóri (t.v.) og Sigurveig Björnsdóttir, ritari hans.