Stofnun Samtaka leikjaframleiðenda

Ég vil byrja á því að óska ykkur til hamingju með ný samtök og þakka fyrir að vera boðið hingað í formlega stofnun þeirra.

Ég fagna ykkur sem öflugum samstarfsaðilum í að gera að veruleika þá sameiginlegu framtíðarsýn okkar að skjóta fleiri og fjölbreyttari stoðum undir atvinnulífið.

Verðmætasköpun með nýsköpun hlýtur að vera okkar leið út úr þessu ástandi sem ég ætla annars ekki að nefna á nafn hér í dag þar sem bjartsýnin ræður ríkjum.

Ótrúlega hröð þróun. Þótt ég eigi minn bakgrunn í tölvugeiranum við vef og gagnagrunnaráðgjöf hugsa ég að nafna mín menntamálaráðherrann þurfi að hafa unnið með ykkur við uppbyggingu ansi öflugs endurmenntunarkerfis í faginu ef ég ætla að eiga afturkvæmt.

Vöxturinn í leikjaframleiðslunni ef til vill ein sönnun þess að við stjórnmálamenn hvorki þurfum né eigum að svara því í smáatriðum á hverju við ætlum að lifa í framtíðinni.

Okkar verkefni er að skapa umgjörðina; hagstæð skilyrði, menntakerfi sem svarar þörfum samfélagsins, stoðkerfi fyrir nýsköpun og verkfæri á borð við háhraðatengingar sem er gríðarlega mikilvægt innanlands og milli landa.

Svo takið þið við keflinu.

Hver hefði reiknað með því fyrir nokkrum árum að leikjaframleiðsla á Íslandi ætti eftir að velta um 10 milljörðum króna í ár?

Við sem höfum verið að berjast fyrir því árum saman að opna augu samfélagsins fyrir mikilvægi þess að hlúa að nýsköpunar- og sprotafyrirtækjum höfum fylgst með leikjaframleiðslunni af miklum áhuga.

Þegar við erum krafin um dæmi um að þetta skili einhverju eða beðin að nefna um hvað það gæti verið þetta „eitthvað annað" sem getur skapað verðmæti fyrir þjóðfélagið höfum við á síðustu árum gjarnan nefnt CCP.

Hér í dag eru mörg dæmi fyrir okkur til viðbótar.

Þegar við keppum á netinu í rafrænum viðskiptum erum við að setja út fyrir sviga okkar stærstu samkeppnishindranir í útflutningi hingað til; pínulítinn heimamarkað og staðsetningu úti í hafi.

Þótt bæði mennta- og stoðkerfið sé mikilvægt, ekki síst efling samkeppnissjóða sem geta hjálpað til að gera góðar hugmyndir að veruleika, skiptir kannski mestu að hvetja fyrirtækin sjálf til dáða.

Þess vegna er mér það sérstakt ánægjuefni að eitt af fyrstu þingmálum haustsins verða frumvörp um endurgreiðslukerfi rannsókna- og þróunarkostnaðar og ívilnanir vegna fjárfestinga í nýsköpunarfyrirtækjum.

Iðnaðarráðuneytið hefur tekinn virkan þátt í vinnslu þessara frumvarpa sem ég vona að verði að lögum fyrir árslok.

Það hefði verið gaman að geta gefið þessum nýju framsæknu samtökum slík lög í vöggugjöf en í staðinn vænti ég þess að við verðum saman á árunum við að koma þeim í höfn.

Að lokum óska ég ykkur alls hins besta og hlakka til að eiga við ykkur frekara samstarf.