Hagræn áhrif skapandi greina

Góðir gestir

Ég treysti því að hér eftir velkist enginn í vafa um mikilvægi skapandi greina.

Þessi geiri, ásamt hugverkaiðnaðinum okkar í heild, er kannski í svipaðri stöðu og ferðaþjónustan var fyrir mörgum árum.

Þá voru eldhugarnir að reyna að láta taka greininga alvarlega sem atvinnuskapandi útflutningsgrein.

En það er svo sannarlega ástæða til.

Fyrir utan umfangið sem farið hefur verið yfir hér í dag vil ég bæta við að þessa greinar hafa gífurlega vaxtarmöguleika.

Þær skapa verðmæt þekkingar- og sérfræðistörf,

... örva nýsköpun innan annarra atvinnugreina,

... gegna mikilvægu félagslegu hlutverki og geta örvað bæði atvinnu- og byggðaþróun.

Svo ég taki eitt dæmi um hin jákvæðu áhrif þá held ég að enginn velkist lengur í vafa um mikilvægi tónlistargeirans fyrir ferðaþjónustuna okkar.

Norðurlöndin hafa átt samstarf um skapandi greinar undir merkjumKreaNord frá 2008.

Nú í lok október október samþykktu norrænu iðnaðarráðherrarnir þrjú sameiginleg stefnumið norðurlandanna á sviði skapandi greina en upplýsingar um þá samþykkt liggja frammi á þessum fundi.

Markmiðið er að styrkja samkepnishæfni, bæta alþjóðlega stöðu greinanna og efla möguleika þeirra sem hluta af verðmætasköpun hefðbundins iðnaðar.

Við í ráðuneyti nýsköpunar og atvinnumála sjáum hinn ört vaxandi hlut skapandi greina í öllu stoðkerfi atvinnulífsins enda mikið verk verið unnið til að ýta undir þessa þróun og efla skapandi greinar.

Af öllum handleiðsluverkefnum Nýsköpunarmiðstöðvar er nú um fimmtungur í þágu fyrirtækja sem telja má til skapandi greina.

Skapandi verkefni eru á bak við tæplega helming allra úthlutana úr Átaki til atvinnusköpunar. Á þessu ári nema styrkir til þeirra samtals um 37 milljónum króna sem er um 40% af heildarupphæðinni

Á frumkvöðlasetrum Nýsköpunarmiðstöðvar eru nú þegar 18 fyrirtæki á sviði skapandi greina.

Þegar breytingar voru gerðar á Tækniþróunarsjóði, flaggskipi nýsköpunarstuðnings í landinu, sótti ég sérstaklega reynslubolta og þungavigtarmann úr atvinnulífinu til að leiða stjórn sjóðsins en hann kemur einmitt úr einni hinna skapandi greina.

Þetta er Hilmar Veigar Pétursson, forstjóri CCP. Hann kemur úr hinum ört vaxandi leikjaiðnaði.

Endurgreiðslur vegna framleiðslukostnaðar kvikmynda hér á landi voru hækkaðar úr 14 í 20% sem hefur skilað fjölda spennandi verkefna og hundruða ársverka.

Nú er að hefjast vinna við að endurskoða endurgreiðslulögin og full ástæða til að skerpa þau og skilgreina markmiðin betur til að geta hækkað endurgreiðsluhlutfallið enn meira.

Áhugi erlendra kvikmyndagerðarmanna á Íslandi fer vaxandi og við þurfum að tryggja að hann skili sér í gjaldeyristekjum, verðmætum störfum og þekkingu.

Hjá Nýsköpunarsjóði er um fjórðungur af eignasafni sjóðsins í skapandi greinum, t.d. á sviði tónlistar og hönnunar.

Sjóðurinn hvetur fólk í skapandi greinum til að leita eftir fjármagni, hugsa stórt, hugsa alþjóðlega og eins og fyrirtæki sem ætlar sér að skapa verðmæti.

Við erum sífellt að leita leiða til að gera betur og sækja fram.

Nú er að hefjast vinna við að móta hönnunarstefnu fyrir Ísland en það hefur aldrei verið gert áður.

Í gær var afgreitt í ríkisstjórn frumvarp um framkvæmdasjóð ferðaþjónustunnar sem mun hafa verulega fjármuni til að styrkja uppbyggingu á fjölsóttum ferðamannastöðum.

Þar er sérstaklega hugað að því að styrkja skipulag og hönnun í þágu náttúru, aðgengis og upplifunar svo þessi sjóður á vonandi eftir að verða enn eitt lóð á vogarskál skapandi greina.

Ég bind miklar vonir við vinnu starfshópsins sem nú á að taka við skýrslunni um hagræn áhrif skapandi greina og vinna úr henni tillögur og aðgerðaáætlun.

Á vegum iðnaðarráðuneytisins og stofnana þess er nú unnið að því að endurmóta allt stoðkerfi atvinnulífsins svo það verði einfaldara, skilvirkara og öflugra.

Okkar hlutverk er að tryggja nýsköpun og vöruþróun svo úr verði enn fjölbreyttari og verðmætari útflutningsgreinar sem hin nýstofnaða Íslandsstofa mun svo aðstoða við að vinna nýja markaði.

Með þetta í huga hef ég ákveðið að leggja fjórar milljónir króna til eftirfylgni við þá vinnu sem kynnt var hér í dag.

Þeim fjármunum verður varið til rannsókna á því hvar og hvernig stoðkerfi atvinnulífsins getur best mætt þörfum hinna skapandi greina.

Í þeirri vinnu væntir iðnaðarráðuneytið og Nýsköpunarmiðstöð Íslands góðs samstarfs við samstarfsvettvang skapandi greina og sérfræðinga Háskóla Íslands auk þess sem við verðum í góðu samráði við fagráð skapandi greina hjá Íslandsstofu.

Þá verður lögð sérstök áhersla á skapandi greinar við auglýsingar og úthlutun styrkja úr Átaki til atvinnusköpunar á næsta ári og má því gera ráð fyrir að stuðningur við slík atvinnuskapandi verkefni verði a.m.k. 50 milljónir króna á árinu.

Með þessu höldum við áfram að feta okkur í átt að enn fjölbreyttara atvinnulífi.

Ég vil svo að lokum þakka öllum fyrir að koma hingað og sýna þessu verkefni svo mikinn áhuga.

Við erum rétt að byrja. Fylgist með.

Með fyrirvara um orðalag sem breyttist í flutningi.