Kynning á úthlutunum úr Tækniþróunarsjóði

Ágætu gestir,

Velkomin til úthlutunar úr Tækniþróunarsjóði.

Tækniþróunarsjóður er flaggskip iðnaðarráðuneytisins í nýsköpunarmálunum.

Mikilvægi hans í okkar huga birtist ekki síst í því að okkur hefur ekki aðeins tekist að verja þennan sjóð gegn öllum niðurskurði í einhverri erfiðustu fjárlagagerð allra tíma heldur tókst okkur að bæta aðeins í á síðasta ári.

Fyrir þessa úthlutun bárust ríflega 200 umsóknir og af þeim hljóta 53 styrk. Alls nema styrkirnir rétt tæpum 353 milljónum króna og ég veit að þeim peningum er vel varið. Og hvernig er annað en hægt – hér koma við sögu sjálfur Þór þrívíddarteiknaður, japönsk sæbjúgu, háþróuð tækni við meðhöndlun á krabbameini, bremsuklossar í sportbíla og fljúgandi vélfugl svo aðeins fáein verkefni séu upp talin af handahófi – og ekki skemmir fyrir að Maxímús gefur tóninn. Öflugt atvinnulíf verður að byggja á fjölbreytileika.

Af þeim 53 verkefnum sem fá nú styrk eru 21 sem flokkast undir hugbúnaðargerð, 12 verkefnanna eru heilsutengd, 10 teljast til verkfræði, 5 koma úr hönnunargeiranum, 4 byggja á matvælaframleiðslu og eitt verkefnanna telst til líftækni.

Þá er gaman að geta þess að aldrei hafa fleiri konur verið verkefnisstjórar – eða fjórðungur. Þetta er góð þróun og mikilvæg.

Þegar við horfum til þeirra tækni- og hugverkafyrirtækja sem náð hafa hvað glæstustum árangri á undanförnum árum erum við um leið að sjá hverju hægt er að áorka þegar djarfir frumkvöðlar fá stuðning Tækniþróunarsjóðs til að gera hugmyndir að veruleika.

•          Marorka
•          Orf líftækni
•          Mentor 

Tækniþróunarsjóður er samkeppnissjóður og ég er ákafur talsmaður þess að við nýtum það fyrirkomulag á sem flestum sviðum þar sem opinber stuðningur stendur til boða.

Þá fer fram opin samkeppni um nýjar hugmyndir sem fær bæði faglega rýni og stuðning.

Umsóknarferlið er um leið reynslu- og lærdómsferli svo það verður vonandi líka þeim að gagni sem ekki fá úthlutun í fyrstu umferð.

Þó skammt sé um liðið frá stofnun sjóðsins, því venjulega þroskast þau verkefni sem sjóðurinn er að styrkja á fimm til fimmtán (líftækni) árum, eru greinilegar vísbendingar um jákvæð áhrif sjóðsins á nýsköpun í íslenski atvinnulífi. Sjóðurinn er að gera gagn og er ein af megin stoðunum við uppbyggingu sprota og nýsköpunar. Þorsteinn Gunnarsson, verkefnisstjóri vinnuhópsins sem vann áhrifamatið, mun fara betur í það hér á eftir. 

Á tímum þegar við þurfum hvað mest á uppbyggingu atvinnulífsins að halda hafa frumkvöðlarnir okkar svo sannarlega sýnt hvað í þeim býr. Þetta sjáum við m.a. á umsóknum í Tækniþróunarsjóð.

Hlutverk okkar stjórnvalda er að skapa skilyrði og forsendur fyrir vextinum.

Það hversu margir Íslendingar eru án atvinnu er óásættanlegt. (% atvinnuleysi er ástand sem við verðum að vinna á og þrátt fyrir að það sé heldur lægra en spár gerðu ráð fyrir í kjölfar falls fjármálakerfisins þá verðum við að gera enn betur í að vinna bug á því!

Þeim sem rýna á frammistöðu og möguleika landsins utan frá ber saman um að við séum á góðri leið.

Lægri vextir og stöðugra gengi skipta atvinnulífið miklu máli.

Senn skapast vonandi forsendur fyrir afnámi gjaldeyrishafta.

Þá er mikilvægt það samkomulag sem náðst hefur um hraða og samræmda úrvinnslu skuldamála lítilla og meðalstórra fyrirtækja.

Það er forsenda fyrir uppbyggingar þessara fyrirtækja sem eru með drjúgan hluta íslensks vinnuafls í starfi.

Við höfum gripið til margvíslegra úrræða.

Sett var rammalöggjöf um ívilnanir vegna nýfjárfestinga og tveir samningar hafa þegar verið gerðir á grundvelli þeirra; vegna Aflþynnuverksmiðju við Eyjafjörð og kísilmálmverksmiðju í Þorlákshöfn.

Unnið er að þriðja samningnum nú þessa dagana.

Samningur um aukna afkastagetu álversins í Straumsvík var undirritaður. Það er fjárfesting upp á tæpa 60 milljarða og 620 ársverk á byggingartíma.

Landsvirkjun að hefja framkvæmdir við Búðarhálsvirkjun sem er fjárfesting upp á um 26 milljarða króna og sex til sjöhundruð ársverk á byggingartíma.

Forsendur hafa verið skapaðar fyrir uppbyggingu gagnaveraiðnaðar með jöfnun samkeppnisstöðu við keppinauta í Evrópu, - breytt lög fyrir jól.

Sett voru lög um stuðning við nýsköpunarfyrirtæki.

Við höfum unnið að eflingu Vaxtarsamninga og í gær var í fyrsta sinn úthlutað úr nýjum Vaxtarsamningi fyrir Suðurnesin.

Fyrir dyrum er að byggja upp atvinnuþróunarfélag á Suðurnesjum og þá er hringnum lokað með slíkri starfsemi í öllum landshlutum.

Í framhaldinu þurfum við að beina sjónum sérstaklega að höfuðborgarsvæðinu.

Frumkvöðlasetrum hefur fjölgað hratt á síðustu tveimur árum og þau eru nú 8 og fóstra 90 til 100 viðskiptahugmyndir með um 300 starfsmenn.

Við erum hér í dag í glæsilegu heilsutæknisetri og ég vona að gestir hafi tækifæri til að kynna sér þau fyrirtæki sem hér eru.  Margt spennandi er að gerast á heilsutæknisviði varðandi verðmat og lífsgæði. 

Auk þessara verkefna höfum við staðið í sérstökum átaksverkefnum.

Á síðasta ári varð til Íslandsstofa sem hefur það hlutverk að efla orðspor og ímynd Íslands sem upprunalands vöru, þjónustu og menningar, sem áfangastaðar fyrir ferðamenn og fjárfestingar- og uppbyggingarkosts.

Eyjafjallajökull sá okkur svo fyrir smá verkefni á því sviði. En með átakinu Inspired by Iceland tókst að afstýra áföllum í ferðaþjónustunni, einni af okkar mikilvægustu útflutningsgreinum.

Raunar virðist sem við höfum um leið lagt grunn að verulegu sóknarfæri.

Enda hef ég lagt áherslu á vöruþróun í ferðaþjónustu og lengingu ferðamannatímans, m.a. með stofnun klasa um heilsutengda ferðaþjónustu og gerð samstarfssamnings um sögutengda ferðaþjónustu.

Alvarlegt ástand á Suðurnesjum kallaði á aðgerðir.

Samráðshópur ríkisstjórnarinnar og Suðurnesjamanna vegna atvinnumála þar tekur heildstætt á öllum innviðum og tækifærum til atvinnuuppbyggingar. Skilgreind voru 11 verkefni sem eru langt komin og næsta skref er formlegt samstarf um framtíðaruppbyggingu.

Unnið er að margvíslegri stefnumótun sem mun nýtast vel á næstu árum til að skapa enn aukin verðmæti.

Í áætluninni Ísland 20/20 eru sett fram mælanleg markmið um bætta samkeppnishæfni og einfaldari og samræmdari áætlanagerð.

Á vegum iðnaðarráðuneytisins er þegar búið að kynna skýrslu um einföldun og eflingu alls stoðkerfis atvinnulífsins.

Þar er áherslan lögð á þekkingarsetur og samstarf heimamanna á hverju svæði, unnið þvert á stofnanir.

Drög að heildstæð orkustefna eru nú í opnu kynningar- og umsagnarferli á vefnum orkustefna.is og ég hvet alla hér til að kynna sér þau og skila sínum ábendingum, hugmyndum og athugasemdum.

Við höfum nýlokið þátttöku í kortlagningu skapandi greina sem dró fram í dagsljósið hratt vaxandi atvinnugrein.

Þar erum við að leggja drög að frekara samstarfi við greinina.

Fjárfestingarstofa og iðnaðarráðuneyti létu gera úttekt á stefnu og starfi vegna erlendra fjárfestinga. Þar er í fyrsta sinn stefna í mótun enda mörg tækifæri og mikill áhugi erlendra aðila þrátt fyrir fullyrðingar um annað.  Erlend fjárfesting hefur verið einhæf.  Við þurfum fjárfestingar á fjölbreyttum sviðum.

Þegar við lítum yfir sviðið er ljóst að við eigum sóknarfæri.

Það er von mín og trú að okkur beri gæfa til að standa saman um að nýta þau.

Þau glæsilegu fyrirtæki og hugmyndir sem hér eru að fá brautargengi gefa mér svo tilefni til að ætla að framtíðin sé björt.

Innilega til hamingju með daginn.  Þið sem eruð að fá styrki.

Þið sem ekki náðuð í gegn í þetta sinn megið ekki leggja árar í bát því þetta er lærdómsferli sem nýtist.

Þakka ykkur öllum ykkar framlög til atvinnu- og verðmætasköpunar. 

Ég hlakka til að fylgjast með.