Fundargerð fjármálastöðugleikaráðs 8. október 2025
Reykjavík, 8. október 2025
Efni: Fundargerð fjármálastöðugleikaráðs
Fundur haldinn í fjármála- og efnahagsráðuneyti.
Ráðsmenn: Daði Már Kristófersson, fjármála- og efnahagsráðherra, formaður, og Ásgeir Jónsson, seðlabankastjóri.
Aðrir fundarmenn: Tómas Brynjólfsson, varaseðlabankastjóri fjármálastöðugleika, Björk Sigurgísladóttir, varaseðlabankastjóri fjármálaeftirlits, Flóki Halldórsson, settur framkvæmdastjóri fjármálastöðugleikasviðs Seðlabankans, Rannveig Júníusdóttir, framkvæmdastjóri skrifstofu bankastjóra, Steinn Friðriksson, sérfræðingur á skrifstofu bankastjóra, Hermann Sæmundsson, ráðuneytisstjóri í fjármála- og efnahagsráðuneyti, Guðrún Þorleifsdóttir, skrifstofustjóri á skrifstofu fjármálamarkaðar og Sigurður Páll Ólafsson, skrifstofustjóri á skrifstofu efnahagsmála, Jón Gunnar Vilhelmsson, skrifstofustjóri á skrifstofu stjórnunar og umbóta, Esther Finnbogadóttir, sérfræðingur á skrifstofu stjórnunar og umbóta, Hilda Hrund Cortez, staðgengill skrifstofustjóra á skrifstofu opinberra fjármála og Sigríður Rafnar Pétursdóttir, ritari fjármálastöðugleikaráðs.
Fundur hófst kl. 13:00.
1. Staða og horfur í fjármálakerfinu og hagkerfinu
Seðlabankinn fór yfir stöðu, horfur og helstu áhættuþætti í fjármála- og hagkerfinu. Dregið hefur úr hækkun íbúðaverðs á höfuðborgarsvæðinu en markaðurinn er virkur. Birgðatími nýrra íbúða hefur þó lengst mikið. Verðbil milli nýrra og eldri íbúða hefur ekki aukist. Niðurstöður árlegs álagsprófs Seðlabankans gefa til kynna að kerfislega mikilvægu bankarnir séu vel í stakk búnir til að mæta óvæntum áföllum. Útkoma álagsprófsins var jákvæð, en hafa ber í huga að íslenskt hagkerfi er smátt og útsett fyrir margvíslegri áhættu, markaðsáhætta er þó tiltölulega lítil. Í fyrsta skipti voru forsendur sviðsmyndarinnar sem lá til grundvallar álagsprófinu sambærilegar við þær sem Evrópska bankaeftirlitsstofnunin notar í álagsprófi á evrópskar bankasamstæður. Varalausnir í greiðslumiðlun voru einnig til umfjöllunar, þar á meðal kortaviðskipti án nettengingar, innviður Seðlabankans fyrir smágreiðslubeiðnir og TIPS smágreiðslukerfi Seðlabanka Evrópu. Áhrif af gjaldþroti Play voru til umræðu. Ekki er talið að gjaldþrotið hafi teljandi áhrif á fjármálastöðugleika. Atvinnuleysi gæti hækkað lítillega og þjónustuútflutningur dregist saman en mikil óvissa er hins vegar um heildaráhrifin þar sem minni innflutningur vegur á móti. Möguleg áhrif af væntanlegri dómsuppkvaðningu Hæstaréttar í málum sem varða breytilega vaxtaskilmála bankanna voru rædd.
2. Sérstök umræða
a) Ríkisfjármál frá sjónarhóli fjármálastöðugleika
Ríkisfjármál voru til umræðu á fundinum frá sjónarhóli fjármálastöðugleika. Var það einkum gert að fyrirmynd nágrannaríkja. Alþjóðleg pólitísk áhætta hefur aukist og í mörgum iðnríkjum eru uppi áhyggjur af sjálfbærni opinberra fjármála og útlit fyrir vaxandi skuldir. Skuldahorfur á Íslandi eru hins vegar jákvæðar. Staða ríkisvíxla, fjármögnunarþörf og fyrirferð ríkissjóðs á skuldabréfamarkaði var til umfjöllunar. Þá var þróun vaxta rædd en ávöxtunarkrafa íslenskra og erlendra ríkisskuldabréfa hefur farið hækkandi á lengri enda vaxtarófsins.
b) Stefna um fjármálastöðugleika
Í gildi er opinber stefna um fjármálastöðugleika frá 2022. Ákveðið var að hefja vinnu við endurskoðun hennar. Ný opinber stefna um fjármálastöðugleika skv. lögum um fjármálastöðugleikaráð, nr. 66/2014, verður undirbúin í samvinnu fjármála- og efnahagsráðuneytis og Seðlabanka Íslands.
c) Svæðisbundin samvinna um rekstraröryggi
Seðlabankinn gerði í stuttu máli grein fyrir ólíkum samstarfsvettvöngum sem bankinn á aðild að og tengjast rekstraröryggi. Netógn vex enn og mikilvægt er að efla enn frekar viðnámsþrótt fjármálainnviða.
3. Önnur mál
Á fundinum var gerð grein fyrir störfum skilavalds frá síðasta fundi ráðsins.
Drög að fréttatilkynningu voru samþykkt.
Fundi slitið um kl. 13:45.
Fundargerð fjármálastöðugleikaráðs (PDF).